চিকেন নাগেট কিদৰে বনাব ?
ঠাণ্ডা বতৰ ৷ চাহৰ লগত পকৰিৰ দৰে কিবা এটা হ'লে খাই ভাল লাগে ৷ বেচন পকৰিও একঘেমীয়া হ'ল ৷ সেয়েহে আজি ভাৱিলো চিকেন নাগেটচ্ বনাওঁ ৷
কি কি লাগিব:
ব্ৰেড্: ৪ টুকুৰা
কুকুৰা মাংস (ব্ৰইলাৰ): ২৫০ গ্ৰাম
নিমখ, জলকীয়া গুৰি: আন্দাজমতে
ৰিফাইন তেল
কৰ্ণফ্লৰ: ৩ চামুচ
ৰাস্ককিট্ বিস্কুট: ৬ টুকুৰা
কণী: ১ টা
কি দৰে বনাব:
ব্ৰেডৰ কেইটুকুৰাৰ কাষবোৰ কাটি সৰু সৰু টুকুৰা কৰি মিক্সাৰত গুৰি কৰি ল'ব ৷ ব্ৰইলাৰ মাংসখিনি বইল কৰি পানী পেলাই দিব ৷ ব্ৰইলাৰ বইল কৰিহে খাব ৷ বহুত বেমাৰ হৈছে আজিকালি ৷ বইল কৰা মাংসখিনিও ব্ৰেডৰ গুৰিখিনিৰ লগত মিলাই মিক্সিত পিহি ল'ব ৷ এইখিনি কোমল হ'বলৈ ৪-৫ চামুচ ৰিফাইন তেল দি দিব ৷ এতিয়া গুৰি কৰি লোৱা ব্ৰেড আৰু মাংসখিনি আটা মৰাদি মাৰি ডাঠকৈ বেলি ল'ব ৷ বেলি লোৱা ৰুটিখন মজলীয়া আকাৰত টুকুৰা টুকুৰাকৈ কাটি ল'ব ৷ এতিয়া ১ টা কণী ভাঙি লৈ নিমখ, আৰু জলকীয়া গুৰিৰ লগত ২-৩ চামুচ কৰ্ণফ্ল'ৰ মিলাই ল'ব ৷ একেসময়তে ৰাস্ককিট্ বিস্কুট কেইটুকুৰা হাতেৰে মোহাৰি গুৰি কৰি ল'ব ৷ এতিয়া টুকুৰা কৰি লোৱা ৰুটিৰ টুকুৰাকেইটা এটা এটা প্ৰথমে কণীত ডুবাই বিস্কুটৰ গুৰিৰে ভালকৈ সানি ল'ব ৷ ৰিফাইন তেল কেৰাহীত গৰম কৰি একেবাৰে কম জুইত ৩-৪ মিনিট ভাজিব ৰঙা হোৱাকৈ ৷ হৈ গ'ল চিকেন নাগেটচ্ :) একদম সহজ নহয়নে? এতিয়া অলপমান টমেট' চচ্ লৈ নাগেটচ্ টুকুৰা সানি লৈ চাহৰ লগত পৰিৱেশন কৰক ৷
আপোনালোকৰ সুবিধাৰ বাবে ৰেচিপিৰ লিংকটো দিলো ৷ এবাৰ চাব বুলি আশা কৰিলো ৷
Comments
Post a Comment